E martë, 29 Nëntor, 2022

ZËDHËNËSI I DASH-së: KURTI E VUÇIQ “DUHET TË BËJNË LËSHIME“

Pas dështimit të raundit të bisedimeve në Bruksel, ndërmjet kryeministrit të Kosovës, Albin Kurti, dhe presidentit të Serbisë, Aleksandar Vuçiq, zëdhënësi i Departamentit amerikan të Shtetit, Ned Price tha se si kryeministri Kurti ashtu edhe presidenti  Vuçiq “do të duhet të bëjnë lëshime për të siguruar që të mos rrezikohen dekada të paqes së fituar me vështirësi në një rajon të brishtë,” – transmeton kdpolitik.com deklaratën e zyrtarit amerikan

Shtetet e Bashkuara u shprehën të zhgënjyera që Kosova dhe Serbia nuk arritën të pajtohen për zgjidhjen e mosmarrëveshjeve për targat e makinave që përdoren nga pakica serbe në veriun e Kosovës dhe kërkuan një afat 48 orësh për t’u dhënë një mundësi diskutimeve rreth kësaj çështjeje. Sikurse transmeton Zëri i Amerikës, ambasadori amerikan në Prishtinë Jeff Hovenier tha se “SHBA-ja është e shqetësuar që udhëheqësit e Kosovës dhe Serbisë nuk qenë në gjendje të arrijnë një marrëveshje sot për zgjidhje të krizës aktuale në Kosovë. Ne kemi kërkuar nga qeveria e Kosovës të pezullojë për 48 orë shqiptimin e gjobave për t’u lejuar Bashkimit Evropian dhe Shteteve të Bashkuara të angazhohen më tej me palët për të gjetur një zgjidhje”.

Kryeministri i Kosovës, Albin Kurti, duke e falënderuar ambasadorin Hovenier për, siç tha, përkushtimin dhe angazhimin e tij, pranoi “ kërkesën e tij për shtyrje prej 48 orësh për vendosjen e gjobave për targat e paligjshme “KM” (dhe të tjera). Jam i lumtur që do të punoj me SHBA-në dhe BE-në për të gjetur një zgjidhje gjatë dy ditëve të ardhshme”, shkroi ai.

Më herët të hënën në mbrëmje zëdhënësi i Departamentit amerikan të Shtetit, Ned Price tha se si kryeministri i Kosovës Albin Kurti ashtu edhe presidenti serb Aleksandar Vuçiç “do të duhet të bëjnë lëshime për të siguruar që të mos rrezikohen dekada të paqes së fituar me vështirësi në një rajon të brishtë,” tha zoti Price.

Zëri i Amerikës thotë se shefi i politikës së Jashtme të Bashkimit Evropian, Josep Borrell ndërmjetësoi tetë orë bisedime të pafrytshme të hënën me udhëheqësit e Kosovës dhe Serbisë, në një përpjekje për të zgjidhur mosmarrëveshje rreth targave të makinave që kanë shtuar tensionet në veriun e Kosovës.

Me një nëntor qeveria e Kosovës filloi zbatimin shkallë-shkallë të vendimit për konvertimin e targave të makinave të lëshuara nga Serbia, me gjithë thirrjet e Shteteve të Bashkuara dhe Bashkimit Evropian për shtyrjen e afatit. Punonjësit serbë u tërhoqën nga të gjitha institucionet vendase me 4 nëntor.

Sipas vendimit të qeverisë nga e marta më 22 nëntor fillon periudha e gjobitjes së atyre që nuk i kanë konvertuar targat e makinave.

Zoti Borrell tha pas takimit të së hënës se të dy udhëheqësit kanë përgjegjësinë “për të shtensionuar situatën”, por se të dyja palët kanë treguar mungesë respekti për detyrimet e tyre ligjore ndërkombëtare.

“Dhe kjo vlen posaçërisht për Kosovën. Kjo dërgon një sinjal politik shumë negativ”, – tha zoti Borrell.

 

Të fundit