E enjte, 2 Shkurt, 2023

Shqipërinë, Kosovën dhe Maqedoninë e Veriut i bashkon megaparku natyror

Do të jetë një hapësirë e re prej 240 mijë hektarësh, e shtrirë në Maqedoninë e Veriut, Kosovë dhe Shqipëri, duke përmbledhur gjithë bukuritë natyrore dhe diversitetin e florës dhe faunës të tre vendeve ballkanike.

Një park natyror i vargmaleve të Sharrit, mund të kthehet shumë shpejt në një ndër pikat më turistike malore në trevat kufitare.

Një mrekulli marramendëse, e cila të merr frymën, me qendër vargmalet e Sharrit, do të kthehet në një ndër parqet natyrore më të mëdha jo vetëm në Ballkan, por në gjithë Evropën.

Janë 37 liqene akullnajore në këtë vargmal. Prej tyre, 25 janë në Maqedoninë e Veriut dhe pjesa e mbetur në Kosovë. Një reflektim gri në të jeshilët, i cili përmbledh në sipërfaqen e xhamtë reflektimin qiellor të begatisë mesdhetare ballkanase.

Maja Ceripasina në vargmalet e Sharrit

Më mbresëlënësi, është biodiversiteti i zonës. Mbi 200 bimë endemike, 167 specie fluturash, 12 lloje amfibësh, 18 reptilë, 130 lloje shpendësh dhe 45 gjitarë autoktonë. Këto shifra, përbëjnë thuajse gjysmën e specieve gjitarë në gjithë Maqedoninë e veriut.

Kjo zonë, ka qenë prej vitesh e rrezikuar

Prerja ilegale e pyjeve ka shkatërruar një pjesë të mirë të florës. Për shkak të tyre, ka pasur në mënyrë të herë pas hershme edhe erozione në zonë. Rreth 40 mijë hektarë të mbjella me pyje janë shfrytëzuar ilegalisht në Maqedoninë e Veriut.

Por, tashmë për palën maqedonase, mund të jetë një mundësi historike e rijetësimit të gjithë sipërfaqes, me projektin e “megaparkut” natyror.

Pas 60 vjetësh vuajtje ekologjike, e gjithë zona mund të rimarrë frymë, nëse projekti rezulton i suksesshëm.

Disa dele kullosin në vargmalet e Sharrit

Ky, është edhe një përafrim me legjislacionin e Bashkimit Evropian. Ky i fundit, kërkon që anëtaret të kenë 12% të sipërfaqes të shpallur zonë të mbrojtur. Nëse projekti realizohet, Maqedonia e Veriut e çon sipërfaqen nga 9% që e ka aktualisht, në 13%.

Brenda parkut pritet gjithashtu të ketë ndarje zonale mbi shfrytëzimin e tij.

Disa qenë të racave autoktone ruajnë kullotat

Jo vetëm qeveria, por edhe sipërmarrësit, e shohin këtë si një mundësi të jashtëzakonshme të zhvillimit të turizmit malor.

Një park, i krahasueshëm me të tjerë simotra në gjithë Evropën. Një park, nga i cili në sipërfaqe – edhe pse më pak – mund të përfitojnë edhe Kosova me Shqipërinë.

Turistët kalërojnë në vargmalet e Sharrit
Një grua përgatit gatimin tradicional të zonës, Fli
Një bari nxjerr kopenë për të kullotur në vargmalet e Sharrit

Marrë nga Albanian Post

Të fundit