E enjte, 29 Shtator, 2022

Fatjona Mejdini: Grupet shqiptare të krimit janë forcuar, pritet përshkallëzim i situatës

Koordinatorja e Global Initiative (organizatë që studion krimin e organizuar), Fatjona Mejdini tha në Euronews Albania se krimi shqiptar ka një tendencë në rritje. Duke komentuar ngjarjen e fundit në Elbasan, ku mbeti i plagosur Ardian Çapja, znj. Mejdini shtoi arsyet reale, që sipas saj kanë shtyrë grupet rivale të përplasen mes tyre.

Ajo u shpreh se Shqipëria nuk është një vend i qetë, ndërsa paralajmëroi një përshkallëzim të situatës në vazhdim.

“Po ndodh ajo që pritje në fakt më thënë të drejtën, por ndodh ajo që në Shqipëri ka nisur në viti ’97 dhe duket se nuk ka ndryshuar ende.  Pas disa muajsh të qetë, si pasojë e pandemisë, ajo që në po shohim është një riaktivizim i krimit të organizuar dhe në atë pjesën që quhet pjesa vizuale e krimit.  Ne po shohim atentate, po shohim vrasje , dhe ajo që pritet të ndodhi është një përshkallëzim i situatës edhe në muajt në vazhdim. Gjithë ideja se Shqipëria tashmë  është një vend i stabilizuar, ku atentatet dhe vrasjet nëpër qytete që i përkasin të shkuarës në fakt duket se nuk është e vërtetë. Shqipëria ka një problem me krimin e organizuar,  ky krim ka evoluuar dhe tashmë është sofistikuar”, tha Mejdini.

Gazetarja shprehet se qyteti i Elbasanit ka qenë një vend tranzit i tregtimit të heroinës, dhe kjo ka bërë që grupet rivale të intensifikojnë përplasjet.

“Nëse ne do të nisemi aq më tepër nga ngjarja e Elbasanit, ne duhet të kuptojmë se pas çdo gjejë ka një logjikë.  Elbasani për një kohë shumë të gjatë ka qenë një udhëkryq i asaj që quhet “Rruga e Heroinës”. Kemi disa rrjedha të rrugëve të drogës në Ballkan, të cilat shkojnë më pas në Evropën Perëndimore që janë edhe tregjet finale, dhe Elbasani duke nisur nga vitet ‘90, ka qenë një zonë e nxehtë për sa i përket grupeve që ishin grupe të strukturuara të heroinës që futen në Shqipëri përmes Turqisë, më pas përmes Bullgarisë dhe Maqedonisë së Veriut, dhe përmes brigjeve shqiptare dhe më pas në Evropën Perëndimore’, shtoi ajo.

Më tej, gazetarja Fatjona Mejdini shton se krimi i organizuar shqiptar është kthyer në problem të madh për Mbretërinë e Bashkuar, Holandën dhe Belgjikën, pasi grupet të ndryshe janë implikuar në tregun e kokainës.

“Ajo që ka ndodhur gjatë këtij 10-vjeçarit të fundit është kalimi i grupeve kriminale në tregjet e kokainës. Grupet shqiptare janë forcuar dhe kanë kaluar në tregje më të mëdha, dhe kanë gjetur tregje të mëdha evropiane.  Sot shqiptarë janë një problem i madh në shumë vende perëndimore. Krimi i organizuar shqiptar është një problem shumë i madh në Angli, janë problem shumë i madh në vendet e Beneluksit, duke nisur me Holandën dhe Belgjikës dhe për këtë ka pasur edhe një pasojë politike”, tha ajo.

Por, si mund të luftohet ky fenomen dhe cilat janë arsyet reale që kanë shtuar veprimtaritë kriminale në Shqipëri, gazetarja Mejdini bën këtë analizë: “Sigurisht mund të ishte parandaluar, por nuk ka një vullnet për të parandaluar dhe kjo është arsyeja që ne shohim.  Është çështje vullneti absolutisht. Krimi i organizuar është sofistikuar, kriminelët janë sot me telefona satelitore, kanë para për të paguar killera. Por çështja kryesore është çështje vullneti dhe ky vullnet mungon. Politika bën syrin e verbër dhe nuk shikon lidhur me aktivitetet kriminale që ndodhin. U lejon terren të lirë grupeve. Edhe sot ka skafe të vegjël që nisen nga Shqipëria dhe përfundojnë në Itali me kanabis dhe armë”, tha Mejdini.

Të fundit